اطلاعات روز: وزارت خارجه به اظهارات قیوم کوچی، سفیر افغانستان در روسیه در مورد شماری از کشورهای آسیای میانه به‌ویژه تاجیکستان واکنش نشان داده و از اظهارات آقای کوچی ابراز تأسف کرده است.
قیومی کوچی حدود ۱۰ روز پیش در اظهاراتی که کارشناسان آن را خلاف عرف دیپلماتیک می‌خوانند، مقام‌های تاجیکستان را به قاچاق مواد مخدر متهم کرده بود و همچنان سران کشورهای آسیای میانه را دست‌نشانده‌ی روس‌ها خوانده بود.
این اظهارات باعث اعتراض تاجیکستان شد و این کشور اعتراض شدید خود را به سفارت افغانستان در دوشنبه ابلاغ کرده و از کابل خواستار وضاحت شد.
وزارت خارجه امروز (شنبه، ۲۵ جدی) در اعلامیه‌یی گفته است که «این اظهارات هرگز از سیاست خارجی جمهوری اسلامی افغانستان در قبال کشورهای همسایه و منطقه نمایندگی نمی‌کند و نظر شخصی او (قیوم کچی) می‌باشد. به همین دلیل، وزارت امور خارجه، تأسف عمیق خویش را در این مورد، اظهار می‌دارد.
وزارت خارجه همچنان گفته که جمهوری تاجیکستان یک همسایه‌ی خوب و دوست همیشگی افغانستان است و رابطه‌ی دوستانه و مناسبات نیک دو کشور، بر مبنای مشترکات و مناسبات دیرینه‌ی تاریخی، فرهنگی، زبانی و دینی دو ملت و همچنان منافع ملی دو کشور، همسایگی خوب و احترام متقابل استوار می‌باشد.
این وزارت ابراز خوشبینی کرده که روابط افغانستان با تاجیکستان در بخش‌های مختلف، در حال استحکام و تقویت بیشتر قرار دارد و هر دو کشور، در مجامع و سازمان‌های منطقه‌یی و بین‌المللی همواره از مواضع یکدیگر حمایت کرده‌اند.
نوشته وزارت خارجه از اظهارات قیوم کوچی در مورد تاجیکستان ابراز تأسف کرد اولین بار در روزنامه اطلاعات روز پدیدار شد.